DBH3ko gurasoekin buruturiko orientazio akademikoko hitzaldia

Apirilaren 5ean, Ikastolako aretoan, DBH4ra begira irekitzen diren ibilbide akademiko desberdinen inguruko informazioa eskaini zitzaizuen.

Hemen duzue bertan erabili zen dokumentua.

DBH 4ko aukerak_gurasoak

Anuncios

Orientazio akademikoko hitzaldiak Salbatore Mitxelena Ikastolan

Joan den asteazkenean, martxoaren 15ean, DBH4ko gurasoentzat orientazio akademikoko lehenengo hitzaldia antolatu genuen, batxilergoari buruzko azalpenak emateko asmoz, arratsaldeko 18:00tan Ikastolako aretoan.

Bertan erabilitako aurkezpena hementxe duzue, lagungarria izango zaizuelakoan gaude.

Batxi_aurkezpena_gurasoak

DBH4 presentación padres_bachi

Joan den ostegunean, martxoaren 16an, berriz, lanbide heziketako zikloen aurkezpena egin genuen.

DBH4 gurasoei aurkezpena_zikloak

DBH4 presentación padres_ciclos

Aste honetan, martxoaren 22an, arratsaldeko 18:00etan Oteitza Lizeo politeknikoko bi kide etorriko dira geurera eta bertako eskaintza azalduko digute.

 

 

Selektibitate berriak bidea jarriko du azterketa gutxiago egin ahal izateko

Iragarritakoaren adinako berritasunik ez da izango, baina bai aldaketa nabarmen batzuk. Unibertsitaterako hautaproba nolakoa izango den erabaki dute Hegoaldeko bi unibertsitate publikoek, eta aldeak daude batetik bestera. Azterketaren egitura bera izango da bietan, aurreko urteetakoa. Bi fase izango ditu selektibitateak: batetik, orokorra, derrigorra, bost ikasgaitako probekin; bestetik, borondatezkoa, nota igotzeko balio duena, gehienez hiru azterketa eginda. Hain justu, borondatezko fase horretan aldaketak egin dituzte: orain arte ez bezala, derrigorrezko lehen fasean egindako azterketak kontuan hartuko dituzte nota igotzeko. Horrenbestez, ikasleei bidea zabaldu diete ikasgai gutxiagotako probak egin ahal izan ditzaten selektibitatean.

Errebalidak ziren orain abian jartzekoak. LOMCEren egutegiaren arabera, aurten amaierako azterketa pasatu behar zuten Batxilergo bukaerako irakasleek. Ez ezartzea erabaki zuen, ordea, Espainiako Gobernuak, gutxiengoan dagoela ikusita. Hezkuntzako «itun nazionala» lortzeko bidea abiatu dute Espainiako Kongresuan, eta hori adostu arte behintzat ez dituzte errebalidak hasiko. Eta gero ere zail dirudi, PP ez beste alderdiak horren kontra baitaude. Kongresuan zer egingo duten zain, hona aurten nolakoa izango den unibertsitateko sarbide proba.

p002_f01

BESTE FUNTZIO BAT DAUKA?

Ez. Izena aldatu diote soil-soilik: Unibertsitatera Sartzeko Hautaproba zen orain arte; orain, Unibertsitatera Sartzeko Ebaluazioa. Izenean badira aldaketak, baina izanean, ez: unibertsitatera joan nahi duten ikasleek bakarrik egin behar dute selektibitatea, eta Batxilergoko titulua berdin emango diete proba hori gainditzen ez dutenei eta egiten ez dutenei —jakina, Batxilergo osoa igaro badute—.

EGITEKO MODUA ALDATU DA?

Ez. Unibertsitate publikoek dute azterketa egiteko ardura: Euskal Herriko Unibertsitateak eta Nafarroako Unibertsitate Publikoak. Egutegi aldetik, aurreko urteetako garaitsu berean izango dira azterketak: ohiko deialdia, ekainaren 7an, 8an eta 9an —asteazken, ostegun, ostiral—; ezohiko deialdia, uztailaren 5ean, 6an eta 7an. Unibertsitatean izango dira probak, gehienez ordu eta erdikoak.

AZTERGAIAK ALDATU DIRA?

Aztertuko den ikasmaila, ez. Batxilergoko bigarren mailako edukiak sartuko dira selektibitatean, ez Batxilergo osokoak —errebalidan, izan ere, ikastaldi osoko arloak sartzeko asmoa zuten—. Ikasgaien edukian izan daitezke aldaketak, LOMCE indarrean baitago.

FASE OROKORRA: ZER DA?

Selektibitateko lehen zatia da, derrigor egin beharrekoa unibertsitatera joateko. Bost proba ditu. Batetik, ikasle guztientzat igualak diren lau: Euskara eta Literatura, Gaztelania eta Literatura, Atzerriko Hizkuntza eta Espainiako Historia. Berritasun bat badago hor: orain arte, Filosofia edo Espainiako Historia, bi horietako bat egin behar zuten, baina LOMCErekin Filosofia kendu egin dutenez, Espainiako Historia da egin beharrekoa. Bestetik, lau horien ondoren, Batxilergoko adarrari dagokion ikasgai baten azterketa egin behar da. Ezarria dago zein egin: Zientzietan, Matematika; Giza Zientzietan, Latina; Gizarte Zientzietan, Matematika Aplikatua; eta Arteetan, Artearen Oinarriak. Berritasuna da hori ere, orain arte ikasleak esaten baitzuen zein egin.

OROKORREKO NOTA, NOLA?

Fase orokorra gainditutzat jotzen dute ikasgai guztien arteko batez bestekoa lau puntutik gora badago. Aldi berean, selektibitatea pasatutzat jotzeko, fase orokorreko notaren eta Batxilergoko notaren artean bost puntu gainditu behar dira. Hau da formula: Batxilergoko espedienteak zehazten du %60, eta selektibitateko lehen faseak %40. Bost puntutik gora badago, unibertsitatera joateko atea irekia du ikasleak. Besterik da ikasleen kopurua mugatua duten karreretan sartzeko aukera izango duen lehen fasean lortutako puntuekin.

BIGARREN FASEA, ZERGATIK?

Karrera batean sartzeko nota igo nahi duten ikasleentzat da. Ez da derrigor egin beharrekoa, hortaz: nota handiagoa lortu nahi dutenentzat da. Beste lau puntu daude jokoan fase horretan; finean, selektibitateko lehen zatiak adinako pisua du sarbide nota jartzeko.

ZER IKASGAI SARTZEN DIRA?

Ikasleak aukeratu behar du zein egin. Batxilergoko adarrari dagozkion ikasgaien azterketa egitea da logikoena, lehenengo zatian egin gabe utzi diren ikasgaienak. NUPen, gehienez bi ikasgai hartuko dituzte kontuan nota igotzeko; EHUn, hiru. Kontua da lehen zatiko azterketak ere aintzat hartuko dituztela. Berritasuna da hori. NUPen, proba bakarra hartuko dute kontuan: Batxilergoko modalitateari dagokion derrigorrezko ikasgaia; EHUn, horrez gain, beste batzuk ere hartu ahal izango dituzte kontuan. Probetan bost puntu baino gehiago atera behar dira aintzat hartzeko.

Kontuan izatekoa da unibertsitate bakoitzak zehazten duela bigarren fasea, eta, hortaz, sistema desberdina dela batetik bestera. Kasu horretan, karrera hasi nahi den unibertsitateko sistema hartu behar da kontuan, hango sarbide nota unibertsitatearen beraren sistemaren araberakoa baita. Alegia, adibidez, selektibitatea Nafarroan egin baina gradua EHUn ikasi nahi bada, bigarren faseko kalifikazioak haztatzeko era EHUren araberakoa izango da.

NUP: NOLAKO PUNTUAZIOA?

Karreran sartzeko nota igotzea du helburu bigarren faseak, eta nota ezartzeko modua desberdina da graduaren arabera: zer ikasi nahi den, Batxilergoko ikasgai bakoitzak pisu handiagoa edo txikiagoa du. Adibidez, Erizaintza ikasteko, bigarren fasean lau ikasgairen azterketak hartzen dituzte nota igotzeko —zientzietako Batxilergoa egin behar da aurrez—: Biologia, Fisika, Matematika eta Kimika. Zientzietako ikasleek Matematikako etsamina egina izango dute lehen fasean, eta, berriro egin beharrik gabe, hura balia dezakete nota igotzeko —lau puntutik bi—; bigarren fasean aukera dute beste hiru ikasgaitako azterketak egiteko, baina betiere bi notarik onenak hartuko dizkiete kontuan. Sistema berbera da Batxilergoko adar bat pasatu izana eskatzen ez duten karreretan. Magisteritzan, adibidez, edozein Batxilergotatik sar daiteke, eta bigarren fasean adar guztietako modalitateko gaiek balio dute nota handitzeko: Biologiak, Fisikak, Matematikak, Diseinuak, Geografiak, Latinak… Modalitateko ikasgai guztiek balio dute lau puntutik bi, Enpresa Ekonomiak izan ezik —hark, bat—; birekin lor daitezke lau puntuak.

EHU: NOLAKO PUNTUAZIOA?

Sistema konplexuagoa izango da Euskal Herriko Unibertsitatean. Haztatze eredu bat jarri dute han ere, eta karrera bakoitzaren araberako pisua izango dute bigarren faseko azterketek. Desberdintasuna: NUPen fase orokorreko proba bat soilik hartuko dute kontuan —modalitateko derrigorrezkoa—, eta EHUn, gehiago ere bai. Izatez, baldintza bat jarri die unibertsitateak fakultate guztiei: nota igotzeko, Euskara kontuan hartu behar dute karrera guztietan. Kanpotik etorritako ikasleekin arazoa sor zezakeen horrek, ez dutelako Euskara eman haiek. Hara formula: ikasgaiak hiru taldetan bildu dituzte, eta talde bakoitzetik nota oneneko ikasgaia erabiliko dute bigarren fase horretan sarbideko nota hobetzeko.

Psikologian, adibidez, bi talde egin dituzte: batetik, Matematika, Matematika Aplikatua, Biologia eta Filosofiaren Historia —lau puntutik hiru—; bestetik, Euskara, Gaztelania eta Atzerriko Hizkuntza —lau puntutik bat—. Bi taldeetako bakoitzean kalifikazio onena duen ikasgaia hartuko dute nota igotzeko. Gerta liteke, baina, azterketarik egin beharrik ez izatea: hizkuntzen azterketa ikasle guztiek pasatu behar dute lehen fasean; Matematika ere pasatu behar dute, eta gizarte zientzietakoek, Matematika Aplikatua. Horrenbestez, kasu horietan, aukera lukete bigarren fasean nota igotzeko batere azterketarik egin gabe.

Ez dira halakoak kasu guztiak, dena dela. Industria arloko ingeniaritzetan, adibidez, hiru talde: bat, Matematika; bi, Euskara, Marrazketa Teknikoa eta Kimika; eta hiru, Fisika. Matematikak lautik bi puntu ditu, eta beste bi taldeek, bana. Zientzietako ikasleek lehen fasean eginak izango dituzte Matematika eta Euskara; Fisika egitearekin osatu ahalko dute dena. Karrera bakoitzeko haztatze eredua zehaztu dute unibertsitateek, eta argitaratua dago informazioa. Oro har, familia berekoak diren karreretan haztatze eredu berbera jarri dute sarbide nota egiteko.

NOIZ ARTE BALIOKO DU?

Lehen fasea gaindituz gero, betiko geratuko da hala; alegia, unibertsitateak «epemugarik gabe» gordeko du kalifikazio hori. Bigarren faseak iraungitze data du: gainditu eta hurrengo bi ikasturteetan soilik hartuko dute aintzat.

Iturria: Berria.eusoina

Eusko Jaurlaritzak irakasteko modua aldatzea proposatu du

cristina-uriarte-eitb_foto610x342

Cristina Uriarte Hezkuntza sailburuak irakasle-ikasketentzako sarbide-proba bat ezartzea eta geletan irakasteko modua aldatzea proposatu du, “akademizismoa” albo batera utziz “ikaskuntza aktiboa” besarkatzeko, irakasleek “oraindik barneratu egin” behar duten zerbait, alegia.

Uriartek agerraldia egin du Eusko Legebiltzarrean, Pisa 2015eko txostenaren emaitzen berri emateko. Azterketak Euskadi Europako batez bestekoaren azpitik jarri zuen matematikan, zientzian eta irakurkemenean, eta azken bi gaietan Espainiako batez bestekoa ez zuen lortu, ezta Ekonomia-Lankidetza eta Garapenerako Erakundearena ere.

Sailburuak azaldu duenez, hiru jarduera-ildo ditu: geletako eredua aldatzea, ikaskuntza aktiboagoa lortzeko, irakurketa-ulermenean hobetzea eta irakasleen etengabeko formakuntza bultzatzea.

Uriarteren hitzetan, curriculum berriek “gaitasunengatik egindako ikuspegia” dakarte, baina irakasletzak horrek dakarren aldaketa oraindik barneratu egin behar duela nabarmendu du, “akademizismotik eta azalpenezko metodologiatik ikasleriaren ikasketa aktibora pasatzea dakarrelako, modu horretan, ikasleak lehen mailako irakaskuntzatik galderak egitea bultzatzeko eta pentsamendu logikoa garatzeko.

“Paradigma berriaren aurrean irakaskuntza klasikoan esperientzia handia” duten irakasleek “defizitak” dituztela esan du Uriartek, eta irtenbidea emateko formakuntza gehiago behar dela nabarmendu du, “bai hasierakoa, baita etengabekoa ere”, honela “profila egokitzeko”.

Sarbide-proba eta irakurketa plana

Halaber, euskal unibertsitateekin batera, irakasle-ikasketentzako sarbide-proba bat martxan jartzea aztertzen ari da, “trebakuntza propioa hasieratik ondo bideratuta egon dadin”.

Uriartek irakasleriaren egonkortasun handiago baten eta “lanbidea aintzatestearen” alde egin du, motibazio metodo modura.

Ikasleen irakurmen gaitasunari dagokionez, Hezkuntza Sailak datorren kurtsoan (2017-2018) irakurketa plan bat egingo du hezkuntza-zentro bakoitzean, eta Euskadiko elebitasuna eta proiektu hirueleduna kontuan hartu beharko ditu.

Edonola ere, egonkortasuna baliotsua dela azpimarratu du, eta hezkuntza “ontzi handi bat da, eta ezin dira berehalako aldaketak eskatu”, ezta “aldaketa zakarrik egin ere”, gaineratu du.

Proposatutako hobekuntzek ez dute Pisarako “probak egitea” bilatzen, “konpetentziak bultzatzea” baizik. Ikasleek “interpretatzen eta hausnartzen” ikastea ere helburu dutela azpimarratu du.

Cristina Uriarte Hezkuntza sailburuak Irakasle ikasketak egiteko sarrera froga egitea proposatu ostean, sindikatuek oso haserre hitz egin dute. Salatu dute irakasleak egin dituztela PISA txostenak utzitako emaitza txarren erantzule, eta ez dela aipamanik egiten irakasleen lan baldintzen inguruan. Xabier De La Maza eta Aitor Urresti solaskideek gai horixe hartu dute hizpide ‘Mezularia‘n.

ELAk, LABek  eta STEE-EILASek agerraldi bateratua egin dute, eta bertan hitz egin dute sailburuek esandakoen inguruan, baina gaurko agerraldiak bazuen beste helburu bat: hezkuntza sisteman egin beharreko aldaketak defendatzea eta lan baldintzak hobetzea, horri lotuta greba deitu dute martxoaren 22rako hezkuntza ez unibertsitarioan.

Hezkuntza sistemaren inguruko hausnarketa egin dute solaskideek.

http://www.eitb.eus/eu/irratia/euskadi-irratia/programak/mezularia/osoa/4651578/mezulariasolasaldia/

Iturria:

eitbeus_20urte_logo_bucle

LOMCEren kontrako protestak egingo dituzte otsailean Euskal Herrian, Herrialde Katalanetan eta Galizian.

Inposaturiko hezkuntza ereduen aurrean eurena eraikitzeko deia egingo dute Ikasle Abertzaleek, SEPCk eta Erguer-ek antolaturiko mobilizazioetan. Euskal Herrian otsailaren 23an aterako dira kalera.

lomce-ez-mobilizazioak-denakjpg

“Nazio gisa zapaltzen gaitu LOMCE erreformak eta bere izaera zentralistak Madrilen esku utzi nahi ditu hezkuntzaren gaineko erabakiak”. Halaxe salatu dute Ikasle Abertzaleek, eta horri aurre egiteko protestak iragarri dituzte otsailerako Galiziako Erguer eta Herrialde Katalanetako SEPC ikasle antolakundeekin batera.

IAk salatu duenez, egungo sistemak nazio, klase eta genero gisa zapaltzen ditu ikasleak. “Egungo sistema gaixotzen ari dira, ikasleon beharrizanak bermatzetik oso urrun, sistemaren sustengurako baliatzen ari dira hezkuntza. Gure arteko konpetibitatea sustatu eta ebaluazio eredu atzerakoiena jarri nahi dute indarrean, sistema kapitalista heteropatriarkalaren beste pieza bilakatu nahi gaituzte bai gu eta bai gure hezkuntza”. Horren baitan txertatzen dute LOMCE eta baita Heziberri ere.

Euskal Herrian, 23an

LOMCEren aurka kalera aterako dira ikasleak, beraz. Euskal Herriko protesta otsailaren 23an izango dela iragarri dute. “Guzti honen aurrean, euskal ikasleok, antolatu, saretu eta erreforma inposatu honi hortzak erakustera goaz. Ikasle Mugimendua gara gure eskubideak borrokatu eta bide horretan inposaketa eta zapalkuntza oro apurtzeko subjektua”.

Albiste hau Topatuk argitaratu du

 

LOMCEren errebalidak: Jaurlaritzak oraindik ez daki egingo diren ala ez.

Cristina Uriarte Hezkuntza sailburuak ez daki zer gertatuko den LOMCE hezkuntza legearekin, Madrilen aldaketarik izango duen edo ez.

57504uriarte LOMCEren errebalidei buruz, Uriartek ez du argitu Madrilek ezarritako hezkuntza legea nola beteko duten aurten. Aurreko urteko errebalidak aldatzea lortu zutela azaldu du, “baina orain zain gaude, ea zer gertatuko den”.

Hain zuzen, EH Bilduk oroitarazi du LOMCEren arabera aurten errebalidak egingo direla Lehen Hezkuntzako 3. eta 6. mailetan, DBHko 4. mailan eta batxilergoko 2. mailan. Jaurlaritzari errebalida horiei buruzko informazioa eskatuko dio, besteak beste non eta noiz egingo diren, metodologia, edukiak, eta ez egiteak edukiko lituzkeen ondorioak. Rebeka Ubera legebiltzarkideak 155 galdera erroldatu ditu, Uriarte hilaren 15ean baita joatekoa Legebiltzarrera.

Bestalde, otsailaren 23an LOMCEren aurkako protestara deitu du Ikasle Abertzaleak ikasle sindikatuak, “gure eskubideak borrokatu eta bide horretan inposaketa eta zapalkuntza oro apurtzeko”.

Iturria:

argia

Jaurlaritzaren curriculum dekretuen aurka salaketa aurkeztuko du Espainiak

Oinarrizko hezkuntzako dekretuaren aurka salaketa jartzeko asmoa du Hezkuntza Ministerioak, Jaurlaritzari iragarri dionez. Dekretuak LOMCE legera moldatu ez izana leporatu dio Gasteizko gobernuari.

Uriarte sailburua eta Mendez de Vigo ministroa, Urkijo Espainiako Gobernuaren ordezkaria erdian dutela.

Araba Euskaraz jaian, herenegun, hizpide hartu zuen Madrilgo gobernuaren jokabidea Cristina Uriartek, Hezkuntza sailburuak; adierazi zuen euskal hezkuntza defenditzen jarraituko dutela Espainiaren «dekretuen eta helegiteen» gainetik. Madrilek hartutako neurri batzuk aipatu zituen jarraian, eta curriculum dekretuen aurkako salaketa ere tartean aipatu zuen. Berria da helegite hori.

Salaketa bera ezarri gabe dago oraindik, baina Hezkuntza Ministerioak asmoaren berri emana dio Jaurlaritzari. Ikusteko dago zer bide egingo duen, hala ere. Batetik, igandeko hauteskundeen ondorengo gobernu berriak eutsiko ote liokeen helegiteari; bestetik, sententzia iritsi arte zer gertatuko den tartean. Kontuan izan behar da, gainera, LOMCE aldatzeko aukera dagoela hurrengo legealdian.

Jaurlaritzak abendu amaieran onartu zituen curriculum dekretu bi: Haur Hezkuntzakoa eta oinarrizko hezkuntzakoa —Lehen Hezkuntza eta DBH daude hor—. Bigarrena salatuko du Espainiak.

Aldaketak dekretuetan

Atzera-aurrera handiak izan dituzte oinarrizko hezkuntzako curriculum horiek. 2014ko urrian aurkeztu zuen lehen zirriborroa Hezkuntza Sailak. Ia 800 orri. Dekretuak bere egin zuen LOMCE: hitzez hitz ageri ziren Madrilen dekretuko atal batzuk. Euskal Herria kontzeptua ere sartu zuten horrekin batera. Finean, beraz, Madrilek ezarritako oinarrizko curriculuma bete zuen Jaurlaritzak, eta «euskal dimentsioa» gehitu. Eragile gehienek kritikatu egin zuten hori; Ikastolen Elkarteak, adibidez, ohartarazi zuen LOMCEren eragin «nabarmena» zuela Jaurlaritzaren zirriborroak.

2015eko otsailean erabat berritutako proposamena egin zuen Hezkuntza Sailak: zehaztasunak kendu egin zituen gaitegitik —800 orri ez, 300 zituen bigarren zirriborroak—. Horren bidez, bi kritikari izkin egin nahi izan zien gobernuak: batetik, dekretuak zehaztuegiak zirela, eta bestetik, «LOMCE ezartzeko tresna» zirela —hori leporatu zioten eragile batzuek Heziberri planari buruz—.

Proposamen hori onartu zuten gobernu kontseiluan, eta ikusteko geratu zen Madrilek zer jarrera hartuko zuen. Heldu da erabakia. Izatez, ez da Hezkuntza Sailaren aurkako eginbide bakarra. Adibidez, LOMCErekin lotuta, errekerimendu bat bidali dio oraindik orain, bukaerako probak ez ezartzeagatik. Jaurlaritzaren bekak ere auzitara eraman ditu, Espainiako irizpideei ez jarraitzeagatik.
Iturria:
2016-06-21 / Garikoitz Goikoetxea / berria.eus

Lanbide Heziketan izen ematea arautzen duen dekretua

 

 

HEZIKETA ZIKLOAK

Izen ematea: ekainaren 6tik ekainaren 17ra. Eskatzen duten dokumentazioa (espediente akademikoa ekainaren 30a baino lehen aurkeztu behar da).

Behin behineko zerrendak: Uztailaren 5ean.

Behin betiko zerrendak: Uztailaren 8an.

Matrikula aldia: Uztailaren 11etik 15era.

 

Plazen %65a: Derrigorrezko Bigarren Hezkuntzako (DBH) graduatu titulua dutenentzat.

Plazen %20: Oinarrizko Lanbide Heziketako titulua duten pertsonentzat.

Plazen %15: Erdi-mailako edo goi-mailako heziketa-zikloetara sartzeko probak gainditu dutenentzat, Hasierako lanbide-kualifikazioko programa baten nahitaezko moduluak gainditu dituzten pertsonak, 25 urtetik gorakoentzako unibertsitatera sartzeko proba gainditu dutenentzat edo beste sarbide motaren bat.

 

 

Iturria: Euskal Herriko Agintaritzaren aldizkaria, 2016ko maiatzaren 20a, ostirala.

AGINDUA, 2016ko apirilaren 26koa, Hezkuntza, Hizkuntza Politika eta Kulturako sailburuarena. Honen bidez, 2016-2017 ikasturtean Euskal Autonomia Erkidegoko ikastetxe publiko eta itunpeko pribatuek eskaintzen duten hezkuntza sistemaren baitako lanbide heziketako zikloetan izena emateko eskaerak aurkezteko epea, onartzeko epeak eta matrikularenak biltzen dituen egutegi komuna ezarri da eta zentro horietan onartua izateko eta matrikula egiteko jarraibideak onetsi dira, hezkuntza hori eskaintzen duten zentro guztietan eskaerak grabatzeko eta matrikula egiteko irizpideak onesteaz gain.

Lanbide Heziketan izen emate datak

Berritzegune Nagusiko Rosa Ortegak bere Orientasare blogean jakitera eman du  Lanbide Heziketan sartzeko eta onartzeko aginduaren zain gauden bitartean, izen emateko daten aurreikuspena lortu duela IKASLAN GIPUZKOAtik.

Era berean Oteitza Lizeo Politeknikokoek ere jakitera eman digute HETELen bilera batean data berdin horiek adierazi dizkietela behin behineko bezala.

 

HEZIKETA ZIKLOAK

Izen ematea: ekainaren 6tik ekainaren 17ra. Eskatzen duten dokumentazioa (espediente akademikoa ekainaren 30a baino lehen aurkeztu behar da).

Behin behineko zerrendak: Uztailaren 5ean.

Behin betiko zerrendak: Uztailaren 8an.

Matrikula aldia: Uztailaren 11etik 15era.

 

 

Garrantzitsua izango da ondorengoak gogoratzea:
Diapositiva26
Diapositiva27
Diapositiva28
Diapositiva29
Diapositiva30
Diapositiva31
Diapositiva32
Diapositiva33